Sie sind hier:
  • Startseite
  • Startseite des Senators für Kultur auf Plattdeutsch

Vun Harten willkamen op de Siet vun den Senater för Kultur

Leve Lüüd,
vun Harten willkamen op de Siet vun den Senater för Kultur!

In Bremen un Bremerhaven is jümmers en Barg los. De Lüüd möög uns Städte. De hier wahnen un arbeiden doot, sünd geern hier. Un de, de ut de ganze Welt na us herkaamt, sünd hier tofreden. Hier finnt jeedeen wat, wat em oder ehr gefallt. Bavenan steiht allens dat, wat dat hier an Kultur to beleven gifft.

In de verleden Johren hebbt wi dat henkregen, all de velen Kulturpunkten so veel Stütt to geven, dat se arbeiden köönt – ok wenn in de Kassen vun dat Land Bremen nich veel binnen is. Ok morgen un övermorgen schall de Kultur de nödige Stütt kriegen.

Jüst in en Gesellschaft mit vele ünnerscheedliche Klören so as bi us, bruukt wi mehr un mehr de Kunst, de Kultur un de kulturelle Bildung. Se speelt en wichtige Rull, dat anner Minschen in us Gesellschaft rinkamen un mit us tohoop leven köönt. Us kummt dat dorop an, dat mehr un mehr Minschen en Togang to de Kultur finnt. Dat gellt jüst ok för de Stadtdelen, in de dat nich so licht to is för de Minschen, bi dat kulturelle Leven mittomaken.

En Stadt, in de veel los is, de bruukt ok veel Kultur. Dor will ik mi för stark maken. Un ik bruuk dor Se Ehr Hölp för. Hebbt Se Ideen, wat wi noch maken köönt? Denn seggt Se us Bescheed. Man ok, wenn wat nich so goot löppt, oder Se wat weten wüllt.
Wi seht to, dat wi gau helpt.

Se Ehr
Börgermester Dr. Carsten Sieling
Senater för Kultur